კახეთის მთვარე
| კახეთის მთვარე ავტორი: გალაკტიონ ტაბიძე |
| 1922 წელი |
ცა ვარსკვლავების ჭიქით
გადაფარული არის,
აი, ტყეების იქით
მოჩანს ბუნაგი მთვარის.
ჩვენ მივდიოდით მთაში,
ვერხვი ღელავდა კოხტა.
სულ დაგავიწყდა მაშინ,
რაც წინაღამით მოხდა.
გრძნობა, პირველი თემა...
გრძნობა პირველი დღისით,
მოგონებები ჩემი,
მოგონებები სხვისი.
გრძნობა, ცხოვრება ზღვაა...
გრძნობა, იცვლება მხარე,
მთვარე კახეთში სხვაა,
სხვაა თბილისში მთვარე.